بودكاست الصحة النفسية

Épisodes

• مين صاحب الحقيقة؟ أنت ولا أهلك؟ صراع السيطرة في غرفة العلاج 13.05.2026 1h 9min

  حلقة بتفتح نقاش مهم حوالين واحد من أكثر المواضيع اللي بتتكرر في العلاج النفسي: مين فعلاً صاحب الحقيقة لما بنتكلم عن مشكلة نفسية؟ هل هي تجربة الشخص نفسه اللي بيحضر الجلسة؟ ولا رواية الأهل اللي شايفين الصورة من برّه؟ في كتير بيعتقدوا إن إدخال الأهل في جلسة العلاج النفسي أو التواصل معاهم بشكل مباشر مع المعالج ممكن يساعد في فهم أعمق للحالة. لكن الفكرة مش دايمًا كده. العلاج النفسي مش بيشتغل كأنه جمع معلومات من أطراف متعددة، قد ما هو مساحة بتركّز على خبرة العميل الشخصية، وإزاي هو بيشوف نفسه، وبيفهم اللي بيمر بيه. في الحلقة دي من بودكاست الصحة النفسية، بنناقش إزاي تدخل الأهل ممكن يغيّر ديناميكية الجلسة، ويأثر على الإطار العلاجي، وإزاي ده ممكن يحوّل العملية من مساحة آمنة للاستكشاف، لمساحة فيها ضغط وصراع على تعريف الحقيقة. كمان بنوضح مفهوم مهم في العلاج النفسي وهو الحساسية الثقافية، وإزاي المعالج الجيد بيكون واعي بالثقافة والعائلة، من غير ما يخلّي ده يطغى على الهدف الأساسي من العلاج: فهم التجربة الذاتية للعميل ومساعدته يوصل لمعناه هو. الموضوع بيمس قضايا زي: العلاج النفسي والعائلة تدخل الأهل في الجلسات حدود العلاقة العلاجية الصراع بين رؤية الفرد ورؤية الأسرة الحقيقة النفسية والهوية
• فوائد العنف ضد المرأة 15.04.2026 50min

  عارفين إن العنوان صادم وممكن يستفزك، بس الحقيقة إننا النهاردة جايين نفتح ملف "مسكوت عنه" ونبص للعنف بمنظور مختلف تماماً عن اللي بنسمعه كل يوم في الميديا والبرامج. كتير لما بنتكلم عن العنف ضد المرأة، بنرمي اللوم على "الضغوط النفسية"، "تربية الراجل وهو صغير"، أو إنه "مش عارف يتحكم في أعصابه". بس هل ده فعلاً الأسباب دي الحقيقة؟ ولا فيه أسباب تانية أعمق بكتير احنا مش واعيين بيها؟ في حلقة "فوائد العنف ضد المرأة" من بودكاست الصحة النفسية، بنناقش فكرة جريئة: ليه العنف لسه مستمر؟ وهل فيه "مكاسب" أو "امتيازات" تانية بيحققها الشخص اللي بيمارس العنف بتخليه متمسك بالسلوك ده؟ هنتكلم عن: حقيقة الأسباب اللي بتخلي العنف الأسري ظاهرة مستمرة. دور المجتمع في تشكيل مفاهيم مغلوطة عن القوة والسيطرة. إزاي الرجولة السامة بتأذي الست والراجل في نفس الوقت. ليه محتاجين نغير "اللغة" اللي بنستخدمها لو فعلاً عاوزين نوصل لـ حلول جذرية مش مجرد مسكنات. إحنا هنا مش بنبرر، إحنا بنبص للموضوع من جذوره عشان نقدر نوقفه. هدفنا هو دعم المرأة وحمايتها من خلال فهم أعمق للواقع بعيداً عن الكليشيهات المعتادة.
• ليه أهلنا بيعاملونا كده؟! 01.04.2026 44min

  يا ريتنا لو نعرف إن "التربية" مش بس أكل وشرب ومصاريف دروس.. التربية الحقيقية هي إنك "تشوف" ابنك أو بنتك بجد، وتحس بوجعهم قبل فرحهم. في الحلقة دي من بودكاست الصحة النفسية، بنلمس وجع بيوت كتير.. الوجع اللي بيجي من جملة "أنا عملت كل اللي عليا عشانهم" وفي الآخر بنلاقي فجوة وصمت مريب بيبني حيطان بين الأهل وأولادهم. بنحاول نفهم ليه الصمت ده بيحصل؟ وليه بنحس إننا بقينا غرب عن بعض وإحنا في بيت واحد؟ بنفتح قلوبنا وبنتكلم عن فكرة "الولد سند".. هل ولادنا وبناتنا فعلًا مشروع بنستثمر فيه عشان نضمن مستقبلنا؟ ولا هما أرواح حرة محتاجة حب غير مشروط مش "دين" تقيل يفضلوا يسددوا فيه طول عمرهم؟ بنناقش إزاي نبني جسر من الود والإنصات الحقيقي، مش مجرد أوامر وكلام في اتجاه واحد. محاور الحلقة اللي هنعيشها سوا: الوجع الصامت: ليه بنبعد عن بعض رغم إننا بنحب بعض؟ الفرق بين السمع والفهم: لما ابنك/بنتك يتكلم، إنت بتسمع صوته ولا بتحس بقلبه؟ علاقة حب مش عقد دين: إزاي نحرر ولادنا من فكرة "رد الجميل" عشان يحبونا بجد وبإرادتهم. صحابي ولا ولادي وبناتي؟ إزاي نكون أمان ليهم من غير ما نفقد دورنا كأهل. شوفوا الحلقة كاملة، لعلها تكون البداية لرجوع الدفا تاني لبيوتنا، وعشان نفهم إن ولادنا هما أمانة مش ممتلكات. #صحة_نفسية #علاقات_أسرية #تربية_بالحب #بودكاست
• أهلك أذوك؟ 18.03.2026 28min

  "أنا عملت عشانهم كل حاجة.. أكل وشرب وتعليم، وفي الآخر ده جزاتي؟" قصادها جملة تانية بتتقال في صمت: "أنا كان نفسي بس حد يسمعني بجد.. مش بس يوفرلي طلباتي." في الحلقة دي من بودكاست الصحة النفسية، بنقرب من منطقة شائكة جداً في بيوتنا.. ليه فجأة الخيط بيتقطع؟ وليه الابن أو الابنة بيختاروا الانسحاب التام كحل أخير؟ إحنا مش جايين نحكم، إحنا جايين "نفهم": سؤال الوجع: هل كفاية إننا نكون "أهل كويسين" بمقاييس الأكل والسكن؟ ولا فيه احتياجات نفسية تانية الأبناء بيموتوا عليها ومش لاقيينها؟ فخ النية الطيبة: ليه أحياناً "النية" مابتشفعش للفعل؟ وليه "حق الشكوى" بيتحول في مجتمعنا فوراً لـ "عقوق" من غير ما حد يسأل عن السبب؟ الميزان المايل: ليه المجتمع بيستوعب قسوة الأهل أحياناً، بس بيقف ضد "وجع" الأبناء لو اختاروا يحموا نفسهم بالبُعد؟ الحلقة دي لكل أب وأم حاسين إن فيه "سد" اتبنى بينهم وبين ولادهم ومش عارفين يهدوه، ولكل ابن وبنت شايلين "حمل" تقيل وحاسس إن صوتهم مش مسموع مهما اتكلموا. إحنا بنحاول في الفيديو ده نلاقي المساحة المفقودة اللي بين "الواجب" وبين "الحب الحقيقي".. المساحة اللي لو فهمناها، يمكن الخيط مايتقطعش أبداً. مستنيين نسمع رأيكم في الكومنتات: هل شايفين إن البعد هو "حل" ولا "هروب"؟ وهل النية الكويسة دايماً مبرر كفاية؟ 👇 #علاقات_أسرية #وجع_البيوت #صحة_نفسية #تربية #فهم_الآخر #جيل_جديد #تواصل
• ليه بنتعصب ونغضب في رمضان؟ 04.03.2026 44min

  ل الصيام فعلًا بيأثر على حالتك النفسية؟ ولا بيكشف حاجة كانت موجودة من الأول؟ في الحلقة دي من *بودكاست الصحة النفسية* بنفكك العلاقة بين الصيام، المزاج، الغضب، وتنظيم المشاعر من منظور نفسي وعلمي. بنتكلم عن إزاي الامتناع عن الأكل مش بس تجربة جسدية، لكن كمان تجربة نفسية بتظهر أنماط دفنّاها طول السنة: توتر، حزن، اندفاع، أو حتى سلوكيات “إدمانية”. هتسمعوا مناقشة عميقة عن: •⁠ ⁠ليه بعض الناس بتبقى أكثر عصبية في رمضان •⁠ ⁠الفرق بين الجوع الفسيولوجي والانفعال النفسي •⁠ ⁠علاقة الصيام بضبط النفس وتنظيم المشاعر •⁠ ⁠هل الصيام ممكن يكون فرصة للنمو النفسي؟ الحلقة مناسبة لأي حد مهتم بـ الصحة النفسية، العلاج النفسي، فهم المشاعر، وتطوير الوعي الذاتي، خصوصًا في سياق رمضان والصيام. لو لقيت نفسك بتسأل: هل أنا بتعصب عشان جعان؟ ولا عشان في حاجة أعمق بتتحرك جوايا؟ شاركنا رأيك وتجربتك في التعليقات. إيه أكتر حاجة لاحظتها عن نفسك في رمضان؟ #بودكاست_الصحة_النفسية #الصحة_النفسية #الصيام #رمضان #الغضب #تنظيم_المشاعر #العلاج_النفسي
• لو دماغك مش بتهدى.. جرب تشخبط! (سر الهدوء اللي محدش قالهولك قبل كدة) 14.02.2026 54min

  بتحس أحيانًا إنك محتاج تهدى شوية وتبعد عن دوشة اليوم؟ في الحلقة دي من بودكاست الصحة النفسية، هنستكشف مع بعض إزاي التلوين ممكن يكون أداة بسيطة لتخفيف التوتر والضغط النفسي، ونشوف إزاي نشاط بسيط زي "الشخبطة" ممكن يساعدك تكون أكتر تركيزًا وتعيش اللحظة الحالية. هنتكلم بطريقة علمية لكن بسيطة عن: - تأثير التلوين على الاسترخاء وتنظيم الجهاز العصبي. - ازاي النشاط البسيط ده ممكن يخليك تنسى القلق شوية وتعيش اللحظة. -ازاي تكون حاضر في هنا ودلوقتي (mindfulness) - فكرة الاندماج والتركيز العميق من منظور نفسي مهني. أهم حاجة: التلوين مساحة آمنة من غير ضغط أو تقييم، لنفسك بس. لو بتحب تشوف محتوى عن الاسترخاء، الصحة النفسية اليومية، اليقظة الذهنية، أو أنشطة بسيطة للتهدئة النفسية، الحلقة دي ليك. شاركنا تجاربك في التلوين في التعليقات، وحبذا لو تجرب النشاط معانا وتشوف الفرق بنفسك!
• سيكولوجية الخيانة - ازاي أتعافى بعد الخيانة؟ 29.01.2026 31min

  أصعب حاجة في الخيانة مش بس إن فيه شخص "خان" الثقة.. الأصعب هو الوجع اللي بيجي بعدها، والأسئلة اللي مابتخلصش بينك وبين نفسك: "أنا كنت وحش في إيه؟" "هو أنا قليل للدرجادي؟". في الحلقة دي من بودكاست الصحة النفسية، قررنا نتكلم عن الخيانة من زاوية تانية خالص.. زاوية الإرشاد النفسي. 🛋️ بنناقش ليه الخيانة فعل "فردي" ملوش علاقة بيك كشريك، وإزاي بنتعامل مع الصدمة دي عشان نرمم الثقة اللي اتكسرت، ونفهم هل هي فعلاً "انحراف سلوكي" ولا ليها تفسير تاني؟ وجعك متشاف ومفهوم، والهدف مش إننا نلوم حد، لكن إننا نساعدك "تظبط ترددك" وتعرف قيمتك الحقيقية بعيداً عن تصرفات غيرك.
• العلاج النفسي حقيقة أم خرافة؟ 14.01.2026 32min

  "يا عم ده شوية كلام، ما تروح تقعد مع حد من صحابك أحسن!".. الجملة دي هي أكتر خرافة بتضيع على ناس كتير فرصة التغير. في حلقة النهاردة من بودكاست الصحة النفسية، قررنا نفتح الملف ده بجد ونرد على أسئلة بتدور في بالكم: هو العلاج النفسي بالكلام ده "علم" بجد ولا مجرد فضفضة؟ وإيه حكاية كيميا المخ اللي الكل بيتكلم عنها؟ اللي هنعرفه في الحلقة: هو الكلام بيعالج؟: هنشرح إزاي جلسات الكلام بتأثر في دماغك زيها زي الأدوية في حالات كتير، وليه هي الأساس مش مجرد "تحصيل حاصل". خرافة الحباية السحرية: ليه الدواء لوحده مش حل سحري؟ وإزاي نفسيتك وكيميا جسمك بيلعبوا مع بعض "هات وخد". مش أي حد تروح له: ليه مش أي طبيب نفسي يبقى بالضرورة معالج نفسي شاطر؟ وإيه هي الشروط والتدريبات اللي لازم تدور عليها في الشخص اللي هيسمعك. المعالج المؤهل: هنعرفك الفرق بين الشخص الدارس والمتدرب صح، وبين اللي بيجتهد اجتهادات شخصية ممكن تضر أكتر ما تنفع. الحلقة دي هي دليلك عشان تفهم السكة صح، وتعرف تفرق بين الحقيقة والخرافة في عالم الصحة النفسية.
• اضطراب الشخصية الحدية مش حقيقي | Borderline Personality Disorder 01.01.2026 21min

  في أول حلقة من الموسم الخامس لبودكاست الصحة النفسية، بنصحّح مفاهيم خاطئة منتشرة عن اضطراب الشخصية الحدّية (BPD: Borderline Personality Disorder). بنتكلم عن إيه هو الاضطراب ده فعلاً، وإيه اللي مش صحيح عنه، وبنفرّق بين الحقائق العلمية والمعلومات الشائعة اللي مش دقيقة. الهدف هو فهم أعمق، مبني على العلم، ويقلّل الوصم المرتبط بيه.
• الصحة النفسية والرجولة 27.08.2025 18min

  كتير من الرجالة في مجتمعنا اتربّوا على فكرة إن الاهتمام بالصحة النفسية معناه ضعف أو "قلة رجولة". لكن الحقيقة إن ده أبعد ما يكون عن الصح. في حلقة جديدة من بودكاست الصحة النفسية، بنتكلم عن العلاقة بين الصحة النفسية والرجولة: ليه لسه في ناس شايفة إن الراجل ماينفعش يتأثر أو يطلب مساعدة؟ وليه الأرقام بتقول إن معدلات الانتحار عند الرجالة أعلى من الستات رغم إن معدلات الاكتئاب عند الستات اعلي من الرجالة؟ الرجولة مش إنك تكتم مشاعرك جواك. انت بشر وانك تواجه مشاعرك وتطلب مساعدة، ده بيشير على الجرأة والشجاعة. في الحلقة دي هنتكلم عن الصور النمطية اللي بتضرنا، وإزاي ممكن نكسرها ونبني مفهوم جديد للرجولة يدي للراجل مساحة يكون إنسان كامل بمشاعره وضعفه وقوته. شاركنا رأيك في الكومنتات: إيه أكتر جملة سمعتها عن "الرجولة" وحاسس إنها بتظلم الرجالة؟
• الدين والعلاج النفسي: هل فيه تعارض؟ 20.08.2025 17min

  فيه اعتقاد شائع إن العلاج النفسي ممكن يتصادم مع الدين والإيمان… لكن الحقيقة إن الاتنين ممكن يمشوا جنب بعض من غير أي تعارض. زي ما بندعي ونصلي بس برضو بنزور دكاترة متخصصين لما نحس بألم، ايه اللي يمنع ان احنا نزور معالج نفسي متخصص لما نحس بألم نفسي أو نواجه تحديات نفسية؟ هل فعلًا لو انا بواجه تحديات نفسية، يبقى ايماني ضعيف؟ ولا ممكن يكون فيه أسباب تانية؟ في الحلقة دي من بودكاست الصحة النفسية، هنتكلم عن العلاقة بين الدين والعلاج النفسية، وإزاي الاتنين ممكن ممكن يتواجدوا في نفس الوقت ومش يتعارضوا. هنناقش الأفكار المغلوطة، ونوضح إزاي إن العناية بالنفس جزء مهم من حياتنا، وإن المعالج النفسي مش بيفرض أي توجهات أو معتقدات على العميل.
• تعمل ايه لو حاسس انك تايه؟ 13.08.2025 20min

  لما بتحس إنك تايه… مش دايمًا بتبقى فاهم السبب، بس الإحساس نفسه بيكون تقيل ومربك. في الحلقة دي من بودكاست الصحة النفسية، هنتكلم عن إحساس "التوهان" من زوايا كتير: ليه بيحصل؟ إيه الجذور اللي ممكن توصّلنا ليه؟ وازاي نتعامل معاه من غير ما نحس إننا لازم نلاقي "الإجابة الصح" فورًا. هنشارك أفكار وتجارب يمكن تساعدك تبص جوا نفسك، وتكتشف إيه اللي محتاجه دلوقتي عشان تمشي خطوة لقدّام حتى لو الطريق مش واضح بالكامل.
• قوة الكلمة وتأثيرها على صحتك النفسية 06.08.2025 28min

  الكلمة اللي بنقولها، حتى لو كانت جوا دماغنا وبس، ليها وزن. ووزن تقيل كمان. بنقعد نقول لنفسنا: "لازم أنجح" "كان المفروض أتصرف أحسن من كده" "ماينفعش أضعف" بس ورى كل "لازم" و"مفروض"، بيستخبى شعور بالخزي، وضغط مش بتاعنا... ضغط إحنا ورثناه من توقعات المجتمع، أو التربية، أو المقارنات. ⛓ الكلمات دي بتعمل لنا سجون من غير قضبان. بنقعد نطارد معايير مش بتاعتنا، وننسى إحنا عايزين إيه فعلًا. في الحلقة دي، هنتكلم عن: 🔹 الفرق بين إنك تواجه نفسك وإنك تِجلِد ذاتك 🔹 إزاي الكلام اللي بنقوله لنفسنا ممكن يأثر علينا بالسلب أو بالايجاب 🔹 وليه تغيير طريقة كلامك مع نفسك ممكن يكون بداية حقيقية للتعاطف والراحة النفسية 🔹 هنعرف يعني إيه لغة داخلية قاسية، وازاي نبدّلها بلغة فيها رحمة وصدق لما تقول لنفسك "أنا هحاول على قد ما أقدر" مش ضعف... ده شجاعة. جرب تسأل نفسك : "هو مين اللي قال إني لازم أكون كده؟ أنا؟ ولا صوت تاني ساكن جوايا؟" 🎧 متفوتش الحلقة دي لو حاسس إنك دايمًا تحت ضغط، أو بتجلد نفسك، أو مش قادر تفرّق بين صوتك الحقيقي وأصوات تانية. الكلام ليه قوة... واختيارك للكلمة الطيبة ممكن يغيّر علاقتك بنفسك من جوة.
• الضغوط النفسية من الأهل والمجتمع: ازاي نتعامل؟ وهل لازم نرضي الكل؟ 30.07.2025 20min

  كلنا سمعنا الجمل دي قبل كده: "امتى هتتجوز/ي؟" "إزاي لسه ما اشتغلتش؟" "لازم تطلع مهندس/دكتور!" ...وجمل كتير بتفضل تلف حوالينا طول الوقت، وتسيب جوانا ضغط، توتر، وشعور بالذنب أو التقصير. في الحلقة دي من بودكاست الصحة النفسية، بنتكلم عن الضغوطات النفسية اللي بتيجي من توقعات المجتمع أو من الأهل، حتى لو كانت بدافع الحب أو "الخوف علينا". إيه اللي بيخلي الضغوطات دي بتأثر علينا؟ إزاي نقدر نميز بين اللي إحنا عايزينه بجد، واللي اتزرع جوانا من غير ما ناخد بالنا؟ وإزاي نقدر نهدّي الصوت اللي جوانا اللي بيحكم علينا وبيخلينا نحس إننا مش كفاية؟ الحلقة دي دعوة للتفكير، واننا نبص جوانا. لأن أول ما نعرف إحنا مين فعلًا، ونعيش على أساس ده، الضغوط دي بتخسر قوتها علينا، وبتبدأ رحلتنا الحقيقية نحو العلاقة مع الذات وفهمها.
• الثلاثة يشتغلونك؟ أنظمة العائلة الداخلية - Internal Family Systems (IFS) 23.07.2025 35min

  الثلاثة يشتغلونك – Internal Family Systems في الحلقة دي من بودكاست الصحة النفسية، هنتكلم عن نظرية علاجية مختلفة ومش مألوفة عند ناس كتير: أنظمة العائلة الداخلية – Internal Family Systems (IFS). بس استنى… إيه علاقة العيلة الداخلية بالتلاتة اللي بيشتغلونك؟ 😮 في IFS، بنكتشف إن جوا كل واحد فينا فيه "أجزاء"… أيوه، كأنك جواك أكتر من صوت/جزء بيتكلم، وممكن نشوف ان كل صوت له شخصية، وله نية طيبة، حتى لو بتظهر مؤذية… 🔹 فيه جزء خايف مش عايزك تتحط في موقف مؤلم تاني 🔹 وجزء مستعد يعمل أي حاجة عشان انت ما تتوجعش 🔹 وجزء تاني صغير جواك مجروح ولسه عايش في صدمة من زمان وعلى عكس ما إحنا متعودين، IFS مش بيحاول يخلّصك من الأصوات دي… لأ، ده بيعلمنا نسمعهم، نفهم هم ايه اللي بيخليهم يتصرفوا كده، ونرجّع الثقة ما بينهم وبين "الذات الحقيقية" اللي جوانا. في الحلقة دي، هنتكلم عن: يعني إيه IFS؟ وإزاي بيشتغل؟ إيه الفرق بين الأجزاء المختلفة؟ وإزاي نرجع نخلي "الذات" هي اللي تقود؟ لو عمرك حسّيت إنك متلخبط، متقسم، مش فاهم نفسك أو بتلوم نفسك طول الوقت، الحلقة دي هتفتحلك باب جديد لفهم أعمق، من غير احكام. اسمع الحلقة للآخر… يمكن تكتشف إن مشكلتك مش إنك ضعيف… يمكن كل اللي محتاجه إنك تقعد مع "التلاتة" وتسمعهم… مش تهرب منهم.
• هل انت عارف نفسك كويس؟ 16.07.2025 26min

  كتير بنقابل ناس تقولك بثقة: "أنا عارف نفسي كويس جدًا، ومش محتاج علاج نفسي." لكن أول ما تسأله: "حاسس بإيه؟" "ليه الموضوع ده وجعك؟" "بتتصرف كده ليه؟" ...تلاقيه مش عارف يجاوب. في الحلقة دي من بودكاست الصحة النفسية، بنتكلم عن الفرق بين "أنا عارف نفسي" و"أنا فعلاً فاهم مشاعري وبقدر أعبر عنها". عن الناس اللي شايفة إنها واعية بذاتها جدًا، بس أول ما تدخل أي علاقة قريبة، تلاقيهم بيتجنبوا المواجهة، أو بيغضبوا فجأة، أو بيهربوا من مشاعرهم. بنفتح سيرة الكلام اللي بنقوله لنفسنا واللي ساعات بيمنعنا نشوف الحقيقة. هل فعلاً محتاج تكون بتعيّط طول الوقت عشان نقول إنك متصالح مع مشاعرك؟ هل الوعي الذاتي هو إنك حافظ شخصيتك في اختبار على السوشيال ميديا؟ ولا في حاجة أعمق بكتير؟ الحلقة دي مش للتشكيك فيك، ولا لتقييمك، لكن دعوة مفتوحة إنك تبص على نفسك من زاوية مختلفة. من غير حكم، ومن غير ما حد يقولك المفروض تبقى إزاي. اسمع الحلقة للآخر، يمكن تكتشف إنك مش محتاج تكون "عارف نفسك كويس" علشان تبدأ تفهمها فعلًا. ويمكن تلاقي أسئلة عمرك ما سألتها لنفسك قبل كده.
• مفيش حاجة اسمها ADHD! 09.07.2025 7min

  مافيش حاجة اسمها ADHD؟ 🤯 في الحلقة دي، هنتكلم عن ADHD من منظور أعمق، بعيد عن التصنيفات الصارمة اللي بتحط الناس في خانات ثابتة. اللي بنسميه "ADHD" مش دايمًا بيبقى اضطراب في المخ، ساعات بيكون طريقة دماغك في التكيّف مع صدمات مريت بيها بدري جدًا... احتياجات عاطفية ما اتلبتش، بيئات سامة كنت بتحاول تنجو فيها، أو مجتمع عمره ما شاف اللي جواك على حقيقته. الشخص مش "تشخيص"، كل واحد فينا إنسان ليه حكاية، وتجارب، وجسمه وعقله حاولوا يساعدوه يكمّل بأي طريقة ممكنة. لو بتحس إنك مشتّت، مندفع، أو صعب تفضّل مركز... ممكن كمان تبدأ تبص لنفسك بنظرة تفاهم وحب أكتر 📌 قولنا في الكومنتات: إيه أكتر حاجة لمستك في الحلقة دي؟
• ليه تدرس علم نفس؟ Psychology O-Level - IGCSE - Mrs. Mariam El Gabalawy 02.07.2025 46min

  Why Study Psychology? Psychology is now officially a subject in the IGCSE O-Level curriculum in Egypt, and many people are asking: “Is this subject really important? How will it help me beyond just getting good grades?” “If I’m not planning to become a therapist, why study it at all?” Or even that phrase we hear all the time: “Psychology makes people go crazy!” In this episode of the Mental Health Podcast, we open up a conversation about the importance of teaching psychology to students—especially during a sensitive life stage when a young person is starting to develop self-awareness and a sense of the world around them. Our guest is Mariam El Gabalawy, who holds an M.A. in Counseling Psychology from the American University in Cairo and has over 7 years of experience teaching IGCSE Psychology. Together, we explore: How is this subject actually taught? Is it just memorization? Or does it offer tools that genuinely help students in their day-to-day lives? Why is it so important that the person teaching Psychology actually has a psychology background, not just a grasp of the syllabus? And how can this subject be a doorway into personal insight—even for students who don’t plan to pursue a career in the field? This episode unpacks the common misconceptions about studying psychology and gives an inside look at the classroom experience—highlighting how psychology can shape the awareness and thinking of the next generation. Whether you're an IGCSE student, a parent, or simply someone curious about psychology—this episode will offer valuable perspective and a fresh way to reflect on what studying psychology really means. 📚For IGCSE Students: To register with Mrs. Mariam El Gabalawy, contact: 01097773880 Mrs. Mariam El Gabalawy Instagram: https://www.instagram.com/mariam.elgabalawy_igcse?igsh=a2k4OWUzMmFkYm90 ليه ندرس علم نفس؟ دلوقتي بقى فيه مادة علم نفس/Psychology في الـIGCSE - O-Level في مصر، وناس كتير بتسأل: "هي المادة دي مهمة؟ تنفعني في إيه غير المجموع؟" "يعني لو مش ناوي أبقى معالج نفسي، ليه أدرسها أصلاً؟" أو حتى الجملة اللي بنسمعها كتير: "ده علم النفس بيجنّن الناس!" في الحلقة دي من بودكاست الصحة النفسية، بنفتح النقاش حوالين أهمية تدريس علم النفس للطلاب، خصوصًا في سن حساس بيبدأ فيه الإنسان يكوّن وعيه بنفسه وباللي حواليه. ضيفة الحلقة هي مريم الجبلاوي – حاصلة على ماجستير في علم النفس الإرشادي من الجامعة الأمريكية في القاهرة، ومدرّسة لـIGCSE Psychology بخبرة اكتر من 7 سنين – علشان نعرف منها: المادة دي بتتدرّس إزاي؟ هل هي بس حفظ ومعلومات؟ ولا فيها حاجات هتفيد الطلبة في حياتهم اليومية؟ ليه مهم إن اللي يدرّس Psychology يكون دارس علم نفس فعلًا، مش بس حافظ المنهج؟ وإزاي ممكن تكون بداية مشوار وعي جديد لطلبة في السن ده، حتى لو مش ناويين يدخلوا المجال؟ الحلقة بتفكّك المفاهيم الغلط عن دراسة علم النفس، وبتقدّم نظرة قريبة ومبسّطة للمادة من جوه الفصول الدراسية ومن واقع التدريس الفعلي، وتأثيرها على وعي الجيل الجديد. سواء كنت طالب/ـة IGCSE، أو ولي أمر، أو حتى مهتم/ـة بمجال علم النفس – الحلقة دي هتفيدك، وهتفتحلك باب جديد للفهم والتأمّل. للحجز مع ميس مريم الجبلاوي، تواصل على: 01097773880 Mrs. Mariam El Gabalawy Instagram: https://www.instagram.com/mariam.elgabalawy_igcse?igsh=a2k4OWUzMmFkYm90
• تأثير الطبقية على نفسية الإنسان المعاصر 25.06.2025 30min

  ليه ممكن تبقى حاسس إنك دايمًا بتحاول "تلحق"، حتى وانت شغال كويس؟ ليه الإحساس بعدم الكفاية أو القلق من المستقبل بيكون ملازمك، رغم إنك بتعمل اللي عليك؟ في الحلقة دي من بودكاست الصحة النفسية، بنفتح موضوع مهم ومُهمل في نفس الوقت: تأثير الطبقية على الصحة النفسية للإنسان المعاصر. الطبقية مش مجرد فرق في الدخل أو أسلوب الحياة. دي منظومة كاملة بتأثر علينا من وإحنا صغيرين، وبتتشكل حوالينا من المدرسة، للشغل، للمواصلات، وحتى في نظرتنا لنفسنا. من خلال منظور التفكير المنظومي، بنتكلم عن إزاي الطبقية بتشتغل في صمت، وبتحفر جوا مشاعر زي الخزي، والدونية، والإنهاك، وإزاي ده بيظهر في جلسات العلاج النفسي بشكل متكرر. في الحلقة دي، هنتأمل سوا في أسئلة زي: إزاي المجتمع بيصنفنا حتى من غير ما ناخد بالنا؟ هل "السعي للترقي الاجتماعي" ممكن يكون مرهق نفسيًا؟ وإزاي ممكن نرجّع لنفسنا إحساسنا بالقيمة بعيدًا عن المعايير المفروضة؟ دي مش حلقة عن "الحلول السريعة"، ولا هتسمع فيها وعظ أو لوم. دي مساحة لفهم أعمق، بتحترم التجربة الشخصية، وبتشوف الفرد كجزء من منظومة أكبر. #بودكاست_الصحة_النفسية #الطبقية #الصحة_النفسية
• هل علاقتك "سامة"؟ 18.06.2025 40min

  هو إيه أصلًا معنى إن علاقة تبقى "toxic"؟ وإمتى نصدق الإحساس ده؟ كتير بنسمع الكلمة دي بتتكرر حوالينا، وكل خناقة أو اختلاف بسيط ممكن يتفسر على إنه علامة إن العلاقة دي لازم تنتهي. بس هل فعلًا كل علاقة فيها شد وجذب تبقى مؤذية؟ هل كل مرة بنختلف فيها مع اللي بنحبه يبقى ده إنذار خطر؟ في الحلقة دي من بودكاست الصحة النفسية، هنتكلم بشكل أعمق عن الفرق بين العلاقات الصعبة والعلاقات المؤذية بجد. وهنفهم سوا إزاي علماء النفس — زي جون جوتمان — قدروا يوصفوا علامات نهاية العلاقة، واللي سماهم "الفرسان الأربعة". بس هنوضح كمان إن وجود مشكلة أو حتى أكتر، مش معناه إن العلاقة دي لازم تخلص، ولا إن الناس اللي فيها مؤذيين بالضرورة. لو إنت محتار وبتسأل نفسك: "هل أنا في علاقة صحية؟ ولا دي علاقة بتستنزفني؟" الحلقة دي معمولة علشانك. هنقرب الصورة من بعضها، ونفك الاشتباك ما بين الخلافات الطبيعية، والسلوكيات اللي فعلاً ممكن تكسر العلاقة ببطء. تابع لحد الآخر... يمكن تكتشف إن اللي كنت فاكره "توكسك"، كان بس محتاج فهم أعمق، أو يمكن العكس.